التعلم الذاتي (أونلاين) self_learning

التعلم الذاتي (أونلاين) self_learning 

التعلم الذاتي (أونلاين) self_learning

في مفهوم محتاج تصحيح عند البعض وهو أن دراستي الأكاديمية فالمدرسة أو الجامعة واني بس اعتمد على اللي باخده فيها من مواد ده كفاية وان ده اللي يخليني مستقرة فيما بعد سواء فتوفير وظيفة أو مواجهة مواقف تقابلني بعدين، ولكن الكلية أو المدرسة مش هتوفرلنا كل حاجة، دورنا أننا نتعلم بنفسنا ونعرف تكتسب حاجه لوحدنا من غير الاعتماد على حد غيرنا وده التعلم الذاتي، التعلم الذاتي، أو التعلم أونلاين، أو التعلم مدى الحياة lifelong learning هو عملية يلعب فيها الشخص دور الطالب والمعلم فنفس الوقت، يتابع تقدمه ويقيمه شخصيًا، يبحث عن كافة المعلومات بمفرده.

بعض النصائح اللي ممكن تهيأنا قبل ما نبدأ نتعلم أونلاين أو ذاتيًا:

اللي ممكن استفاده من التعلم ذاتياً
الاستفادة من E-learning أو self learning عمومًا لا حصر لها ولكن من أهم الفوائد:
1 – الاعتماد على النفس
الشخص اللي بيتعلم ذاتياً بيبقى قادر على أنه يعتمد على نفسه فأي موقف يبقى عنده soft skills من غير حتى ما يعرف تلقائيًا بيبقى قادر يتعامل فوسط ضغط لو قابلته مشكله لانه كان ففترة لوحده واتعلم لوحده، الثقة بالنفس بتزيد لما الإنسان يكتشف بعد مدة أنه قدر يكون مراقب على نفسه بيزاكر لنفسه مش محتاج حد يساعده، يعرف أنه مش عاجز عن تحقيق أي حاجة لو حاول وتعب.
2 – عقل ناضج
بيتحول عقل الإنسان من مجرد تفكير في التسلية وتضييع الوقت على سوشيال ميديا أو غيره لعقل واعي عنده علم إلى حد ما كافي مش مقتصر على الدراسة الأكاديمية وبس، عقل قادر على أنه يفكر صح ميهتمش غير لمستقبله واللي هيفيده ويخليه يتطور اكتر
3 – إنسان جاهز لسوق العمل
اني اتعلم مهارة معينة واشتغلت على اني اوظفها فحياتي وافكر ازاي استفاد بيها واحولها لوظيفة مستقلة اشتغل بيها وتوفر مصدر دخل جانبي لحد ما اكون جاهز لأني اشتغل فمجالي يعني تهيأني أكون freelancer، إني أكون متعلم لغة أو إني متعلم مهارة مطلوبة هتزود من فرصة اختياري للوظيفة.
4 – توفير الوقت والمال
 غالبية الكورسات والكتب اللي بيحتاجها المتعلم بتكون مجانية، وفي حالة الكورسات المدفوعة بيبقى سعرها برضك قليل إلى حد ما، وممكن اعوض الكورسات المدفوعة من على اليوتيوب مجانًا.

معوقات التعلم ذاتيًا

أي اللي يمنع اي حد من إنه يبدأ يتعلم لوحده؟!
سؤال كان غرضه إني اجمع معظم الأسباب اللي ممكن تخلي اي حد ميتعلمش أونلاين أو يطور نفسه، ودي كانت الأسباب اللي أجمع عليها غالبية الناس
1- الكسل، والملل اللي بيبقى ناتج عن الانشغال بالسوشيال ميديا، وإن مفيش deadline يخلي المتعلم ينجز ويخلص فبيتكاسل ويماطل.
2-فقدان الشغف والحماس اللي بيبقى سببه أحيانًا طول المدة اللي محتاجها علشان اتعلم اونلاين وتحقق إنجاز فيها.
الإحباط والانتقاد اللي بيواجهه اي حد حابب يتعلم حاجه تحت مسمى (ياعم هو انت يعني هتعمل اي باللي بتتعلمه ده) واللي بدوره بيخلي الثقة بالنفس تنعدم والشخص بيوقف من قبل ما يبدأ
3-التشتت من خلال وضع أهداف كتير ومهارات كتير عاوز اتعلمها فنفس الوقت، أو التسجيل فأكتر من كورس ومركزش على مهارة واحدة بس أو اتنين اتعلمهم وأبدأ فاللي بعدهم.

حقائق المفروض نعرفها علشان نعرف نبدأ فالتعلم الذاتي

1-الإيمان بالنفس، اللي قدر ينجح مرة ويتعلم المهارة دي، يخليك تقدر انت كمان تتعلم، ومتحكمش على نفسك من خلال نظرة شخص ليك أو رأي أنه التعلم الذاتي ده مش مفيد، بعد فترة معينة هنندم على اننا ضيعنا يوم من غير ما نتعلم حاجه تفيدنا.
2-التعلم الذاتي محتاج وقت وصبر، متتوقعش النتايج من بعد يوم اتنين اسبوع، الصبر والتركيز وعدم الاهتمام بالمدة ده هيخليك تتعلم الحاجه على أكمل وجه من غير كروته، الصبر ثم الصبر ثم الصبر.
3-اعرف انت مهتم باي عاوز تتعلم اي، محتاج تتعلم لغة، برمجة، رسم، مهارة ذاتية، ايًا كان اللي حابب تتعلمه المهم تبقى عارف بالظبط انت عاوز اي، استخدم الورقة والقلم وفضي عليهم كل اللي فدماغك ورتب أفكارك.
4-بعد المرحلة دي تيجي مرحلة تحديد المصادر والمنصات اللي بتدرس الحاجه اللي عاوز تتعلمها، حدد منصة واحدة فالبداية وقناة يوتيوب لحد بيشرح برضك الموضوع وكتاب يفيدك، جمع المعلومات الكافية عن المهارة اللي عاوز تتعلمها.
5-أسأل أهل الخبرة، متعتمدش على المعلومات اللي جمعتها وبس لا اسال ناس اتعلمت المهارة دي والمحال ده وتستفيد من خبراتهم وتعرف اي الكتب اللي نفعت معاهم اي الكورسات اللي اخدوها، ازاي كانوا بيزاكروا واتعلم منهم.
6-متقولش لحد انك هتبدأ تتعلم كذا، أو انا شغال على مهارة وبطور نفسي، ولا حتى تنقل كل خطوة انت بتعملها خلال رحلة تعلمك، لأن ده بيخليك حماسك وشغفك، تفقد الثقة وتوقف اللي كنت بتعمله لمجرد تعليق من حد أن اللي بتعمله ده مش مفيد، الكتمان، الكتمان، الكتمان، متقولش وقت بدايتك ولا أثناء المزاكرة، ووريهم النتيجة لو حابب لانك هتكون خلصت خلاص وانجزت وتبقى قادر على انك تفيد غيرك فنفس المجال.
7-متسمحش لحد يقلل منك ولا من أنه يقول أنك مش هتقدر تعمل حاجه، ده رأيه الشخصي، مش حقيقتك،طالما ربنا سبحانه وتعالى زرع الأمل فيك يبقى في أمل انك تنجز، كل المطلوب هو السعي والصبر وأننا نثق فالله أنه مش هيضيع التعب ده، ربنا وحده اعلم بكل لحظة انت بتتعبها وتعيشها وهو الوحيد اللي قادر على توفيقك فمتعتمدش على رأي بشر.
8-وأخيرًا وقت ما تقع افتكر الآيات دي ( وليس للإنسان إلا ما سعى، وأن سعيه سوف يرى، ثم يجزاه الجزاء الأوفى)
(وما توفيقي إلا بالله)
وده موقع يشجعك انك تنجز وتتعلم حاجة ذاتيًا من خلال عرض قصص ناس اتعلمت وإنجازاتها
https://www.facebook.com/groups/courst2020/?ref=share
 وافتكر دائماً أن
The capacity to learn is a gift; the ability to learn is a skill; the willingness to learn is a choice
Brain Herbert


تابعنا على فيس بوك