مرحبا بك في عالم ما بعد الثانوية

أبطال الثانوية العامة

مرحبًا بكم في عالم ما بعد الثانوية

نقول حمدًا لله على سلامتكم من رحلة طويلة دامت سنة كاملة كلها تعب ومزاكرة ودروس وضغط نفسي وضغط من الأهل وصدمات كتير حصلت خلال السنة دي ونقدر نقول أنكم أبطال،

أبطال علشان استحملتوا كل ده، أبطال علشان كان حلمكم هو انكم تشوفوا الفرحة في عيون أهلكم، أبطال علشان كافحتوا وزاكرتوا مواد مش كلها بتحبوها وكنتوا مجبورين عليها، أصبح الكلام عن أن المجموع ده مجرد رقم، ومش هو مقياس لذكاءكم، أومقياس لأن الشخص ده مستواه عالي من المسلمات خلاص، والكلام في كتير، افرح بخروجك منها وانت سليم معافى، وانت جايب مجموع ايا كان من منظورك قليل عالي هو أفضل ليك. وكفاية نجاحك فالاختبار الإلهي وهو أنك برغم وجود كل السب اللي تستهلك إنك تغش وقولت لا أنا هنجح بطريقة ترضي ربنا، ودي ثوابها عظيم عنده.

خدعوك فقالوا
( أن انت لو مجبتش طب أو صيدلة أو هندسة أو  غيره يبقى أنت كده ضيعت، حلمك ضاع، تعب السنة راح)  ربنا سبحانه وتعالى قال "وأن ليس للإنسان إلا ما سعى، وأن سعيه سوف يرى، ثم يجزاه الجزاء الأوفى".

خدعوك فقالوا
( أن الثانوية حظ) ، ربنا سبحانه وتعالى قال " وكل شئ عنده بمقدار".

خدعوك فقالوا
(الكلية الفلانية ملهاش مستقبل هنا وملهاش شغل) وربنا سبحانه وتعالى قال " وفي السماء رزقكم وما توعدون".

إن كان مجموعك اللي انت جايبة دلوقت مزعلك، فتأكد تمام التأكد أن عوض ربنا هيجي أكبر من اللي اتوقعته، وما كان ربك نسيًا، مهما عدت السنين هيعوضك، فأهلك فصحتك فشغلك فيما بعد، الثانوية العامة مش آخر الدنيا زي ما كانوا بيخدعونا ولا هي سنة مصيرية زي ما كانوا بيضحكوا علينا، افرح علشان عندك شغل كتييييير أنت بقيت طالب جامعي، ومرحلة المدرسة خلصت خلاص، وفوق لنفسك بقى وتأقلم مع الوضع الجديد وحول نفسك انت لقمة فكليتك. مجموع الثانوية العامة مجرد رقم وبس رقم هتنتهي أهميته مع دخولك الكلية، ويبقى الفيصل بينك وبين زمايلك هو دراستك الجامعية، كورساتك، مهاراتك اللي اكتسبتها، تطوعك، الصداقات اللي كونتها. 
خلي عندك يقين بالله كبير جدًا أنه مش هيظلمك أنت وينصف غيرك ربنا اسمه العدل، الجبار _جابر الخواطر_، ربنا هيعوضك وهتكتشف أن الكلية دي هي مكانك.

رسالة للآباء

افرح بنجاح ابنك أو بنتك، لو مجبش المجموع اللي أنت كنت عاوزه افرحله واعمله احتفال وكأنه عمل أعظم إنجاز لانه فعلا إنجاز، هو بيكون تعبان ومستحمل مزاكرة وقرف علشانكم علشان يخليكم فخورين بيهم، حتى لو مش راضي عن مجموعه لمجرد ما بيشوف فرحتكم بيفرح، في طلبة كتير تدمرت بسبب رد فعل أهلها واتهامهم بالتقصير، وفي طلبة حققت إنجازات كبيرة جدا لمجرد نظرة الفرحة اللي شافوها في عيون أهلها يوم النتيجة، افرحله علشان يكمل، ويحقق حلمك وحلمه بشكل مختلف عن اللي كنت بتتمناه له بشكل أفضل.

أعمل أي خلال فترة الجامعة

1- بقيت حر

اعتمد على نفسك فأغلب الأمور، أنت خلاص بقيت شخص حر، دراستك هتسمع المحاضرة من الدكتور، وهيبقى دورك أنك تزاكرها لوحدك من غير مدرس مخصوص يشرحلك زي ما كنت متعود، بقيت رقيب على أفعالك وتصرفاتك، وأي مشكلة المطلوب منك أنت تحلها بنفسك.

2- متعتمدش على كتاب الجامعة وبس

استخدم الانترنت وكتب ومصادر تانية علشان تحقق أكبر استفادة، سواء تسمع محاضرة مختلفة عن اللي اخدتها بس بتشرح نفس الموضوع، أو تقرأ مقال عنه، زاكر بذكاء.
ممكن تستعين بالطريقة اللي في البوست ده
https://www.facebook.com/groups/3433010086750040/permalink/3442610785789970/

https://www.facebook.com/groups/3433010086750040/permalink/3454434021274313/

3- عافر وحاول

جرب كل حاجة واشتغل وحاول وخبط فالدنيا واقع وقوم من تاني واتعلم من الغلط اللي غلطت في وشوف انت قصرت فأي وصلحه، احنا مش عايشين علشان نرتاح فيها دي دار الشقاء والتعب، الترفيه يبقى فاصل إعلاني علشان ترجع تاني للشغل والدراسة والتعب، بس ميكونش الترفيه اسلوب حياة والهدف الوحيد اللي أسعى له.

4- فلتر علاقاتك

خلي بالك وانت بتختار الناس اللي حواليك، اختار دايما العلاقات المريحة اللي مفيهاش عتاب أو نقف ع الواحدة والعلاقات اللي كلها مشاكل، مش وقته تضييع وقت على علاقة زي دي، اعمل فلترة للناس اللي فحياتك واللي هو اه مش هنبعد عنهم بس العلاقة تكون سطحية، اللي سوديك فسكة آخرها هلاكك ابعد عنه، المرء على دين خليله. وأهم علاقة هي اللي تعافر فيها وتتعب وتجتهد علشان تحافظ عليها هي علاقتك بربنا سبحانه وتعالى، هتقابلك مشاكل وصعوبات كتير مش هيسعفك فيها رحمة ربنا، ادعي دايما فكل لحظة إن ربنا يقويك على الحياة الجديدة دي، تقرب منه ولو بصفحتين من المصحف، بأذكار الصباح وانت رايح الكلية، بركعتين قيام الليل وأنت محتاس ازاي هتلم المواد، حافظ على علاقتك بربنا علشان هي بتمشي برحمته وبركته وتوفيقه وبستره.

5- اتعلم تكون freelancer

أسس شغلك الخاص بيك خلال الفترة دي، لتعود يبقالك مصدر دخل خاص بيك لو مش هقدر توازن بين الشغل بدوام كامل فأي حتة. الشغل في الفترة دي هيعلمك تعتمد على نفسك وهيعلمك تحمل المسؤولية. 

بعض الخطوات قبل ما تبدأ فشغلك الحر 

https://youtu.be/8ijsxKzgROM

أفضل مجالات freelance
https://businessideas2030.com/%D9%85%D8%AC%D8%A7%D9%84%D8%A7%D8%AA-%D8%A7%D9%84%D8%B9%D9%85%D9%84-%D8%A7%D9%84%D8%AD%D8%B1/

6- اقرأ كويس عن الكلية

حاول قبل ما تدخل الكلية اللي ربنا اختارهالك _وتأكد تمامًا أن اختيار ربنا دائمًا بيبقى خير_أن تدور كويس وتسأل عن أقسام الكلية وهتدرس أي بالظبط طب ده هينفع ليا ولا لا وابعد عن اللي يقولك (اوعى تدخل كليتي) قبل ما تغير وجهة نظرك فكر لخمس ثواني وقول طب هي لو كلية مش كويسة الشخص اللي حذرني ده لي لسه قاعد فيها طب لي مغيرهاش، وبرضك ابعد عن اللي يقولك دي كلية وحشة دي فيها وفيها وأنا شيلت فيها مواد وملهاش مستقبل واللي بيدخلها مبيخرجش، فكر برضك لنفس ذات الخمس ثواني برضك هو مخرجش منها لي؟؟. متبنيش حياتك على تجربة ناس تانية فشلت أو حتى نجحت، دي حياتك انت عيشها بطريقتك بالصعب اللي فيها والحلو اللي فيها خلي لنفسك تجربة خاصة متكررش نفس الغلط وتزعل وتحبط بسبب تجربة اي إنسان تاني، افضل دايما فحالة تساؤل (طيب اللي نجح نجح لي؟ كان بيعمل اي؟)، (اللي بيحذرني ده فشل لي؟وازاي مكررش غلطه؟)، عيش تجربتك بطريقتك أنت. 

7- أخرج برا comfort zone

احضر ايفنتات وندوات فالكلية ولو في فرصة تطوع جرب واشترك فيها اطلع برا الفقاعة اللي كنت فيها وتكسر حاجز الخوف واتعامل مع الناس، واسأل أهل الخبرة علشان تستفيد من تجاربهم وتوفر على نفسك عناء وتعب خطوة ممكن تتجنبها لمجرد معرفتك هما عملوها ازاي.

8- اللغة، اللغة، اللغة. 

الكلام عن أهمية اللغة كتير جدًا، وافضل فترة تحسن فيها لغتك هي دلوقت، اتعلم وخد كورسات، والأونلاين مخلاش حاجه، واللغة مش حاجه ثانوية أنت هتدرسها علشان تتميز، لا اللغة بقيت من المسلمات خلاص وبيبقى جزء من الحياة. اتعلم لغة تانية، وأبدأ بالإنجليزي.

9- اقرأ.

خصص من وقتك ولو ربع ساعة تقرأ فيهم عن مجالك، عن حاجه بتحبها، القراءة هتغير طريقة تفكيرك بشكل كبير، هتعكس شخصيتك، هتبقى واعي بشكل أكبر، اقرأ ولو مقالات صغيرة لحد ما تتعود تقرأ كتب كبيرة. 

ترشيحات لبعض الكتب: 

1-لأنك الله (علي بن جابر الفيفي)

2- أربعون (أحمد الشقيري)

3- استمتع بحياتك (محمد العريفي)

4- عشرة أمور تمنيت لو عرفتها قبل دخولي الجامعة (ياسر بركات)

5- المعنى في طريقي (حسام هيكل) 

6- علاقات خطرة (محمد طه)

7- فاتتني صلاة (إسلام جمال)

8- شيفرة بلال (أحمد خيري العمري)

9- مدارج السالكين (ابن القيم الجوزيه)

10- مُلهمون (صالح بن محمد الخزيم)
11- استرجع قلبك (ياسمين مجاهد)

10- خد كورسات كتير جدا. 

أفضل طريقة تعوض بيها كلية معرفتش تدخلها هي انك تاخد كورس فمجال من مجالاتها واحترف المجال ده علشان لو حبيت تعمل career shift تشتغل فالحاجه اللي بتحبها، أفضل طريقة هتسهلك دراستك هي الكورسات لأن بقى في كورسات لكل المجالات الدراسية تقريبًا، الكورسات ففترة الجامعة هتوفر عليك سنين ما بعد الجامعة.

احرص على أنك تاخد كورسات على الأقل فمجالين أو تلاتة من دول:

1- مهارات شخصية soft skills

2- تسويق وإدارة أعمال والدعاية

3- بحث علمي 

4- تصوير

5- برمجة وتصميم مواقع وتطوير المواقع

6- كورسات IT زي ICDL , IC3

7- اللغات أكيد 

8- خدمة العملاء 
9- كتابة المحتوى
10- الرسم والخط سواء عربي أو إنجليزي

11- شوف فيلم يشجعك

لو حبيت تفصل ممكن تشوف أفلام ليها قصة وممكن تغير نظرتك للحياة زي: 

1- the persuit of happyness

2- Gifted hands

3- Akeelah and the bee 

4- 3 idiots

5- super 30

6- Hechki

وأخيرًا 

نظم وقتك ما بين خروجات وفسح وبين مزاكرة وبين شغل وبين self development وبين علاقتك مع اللي حواليك وبين علاقتك مع ربنا سبحانه وتعالى، خطط، خطط، خطط، عيش حياتك وانت حاسب ومخطط لكل حاجه الحياة بعشوائية هتضيع وقت كتير جدًا.

خلال الفترة دي هيحصل تغييرات جذرية فطريقة تفكيرك، طريقة تعاملك مع الناس، بس الأهم متضيعش ثانية واحدة على حاجه ممكن توجعلك قلبك ودماغك، مفيش حاجه هتستاهل تضيع فيها عمرك إلا التعب والسعي لأنك ترضي ربنا، وخليك متأكد أن عوض ربنا هيجي لا محالة، ولكن المطلوب مننا نصبر مش من قلة حيلة بل نصبر واحنا على يقين أنه هيعوضنا.

ربنا يوفقكم.

المقالات السابقة 

الصفحة على فيس بوك